15de eeuws afschrift

Johannes by der gratien Goids hertoiginne van Lutoenborch, van Lothryc, van Brabant, van Lymborch ende mercgrevinne des Heilichs Rycs doen cont allen luyden, dat wy geoerloft hebben ende oerloven ende met desen brieve ende volcomen macht geven Godevaerden Hendrix sone van Hermalen onsen mannen van leene, dat hy Des Scrivershoeve (1) gelegen in de parochie van Schijndel, houdende vyftich buenre off daeromtrent die hy van ons in leen houdende is uutgegeven mach te renten of te tynsen alynge of met stucken alsoe dat hem orberlicste duncken zall, met alsulken conditien ende vorwaerden, soe hy dair af te pachte ofte te tijnsse uutgeven zall of soe wat daeraf te pachte ofte te tynse uutgegeven is hier voertyts by zynen voerderen besitteren des vorscr. leens, dat men dat aen den voirscr. Goderden of aan zyne naecomelinge besittende desselfs leens, alsoe dicke alst versterft of als ment verandert, gewynnen elken buenre met enen auden groten Toornoyse munte des Coninx van Vranckrycke oft metter weerden daeraf sonder myndernisse zyns principaels chyns.
Voert soe consenteren wy ende oerloven de voirscr. Goderden met desen brieve, dat hy zyne kynderen die hy by zynen wittige wive heeft, gueden sal moigen uut den vorscr. guede geheiten Scrivershoeve, hen daeraf stucken sal moigen geven met buenren in lande te leene, te tynse, te houden van hem in alsulker manieren dat hyselve of zyn outste sone of diegene die in tyden toecomende besitter zyn sal des leens principalic behouden zall ende hebben zall moeten XL scillinge outs gelts siaers te voeren wten voirscr. leen ende alle tynse iaergelt, gueden ende ontgueden ende gewynnen van den voirscr. guede comende. Ende die manscappen of men daerof ennige guede in leene wtsette of te leene wtgeve willende ende consenterende, dat dese voirscr. Godevaert ende zine nacomelinge hebbende ende besittende des leens erven ende onterven moigen alle luyde des guets houdende in tynse of in leene voer die laet desselfs goet houdende zyn oft voer twee onser mannen van leen, die daer alse getugen bystaen zullen ende bystaen moeten by versueck des voirscr. Godevaerts of sine nacomelinge hebbende ende besittende des leens ende guets voirscr.; allen argelist uutgesceiden ende behoudelinge ons ende onse nacomelinge hertogen in Brabant, dat die gront des voirscr. leens ende goids onse leen altoes bliven zall totte maten toe van viertlich buenre of daeromtrent.
In welken getuygenissen ende vesticheyden wy onsen zegel gehangen hebben aen desen brief.
Gegeven tot Brussel opten twelfsten dach in decembri int iaer ons Sheren dusent dryehondert tsestich ende sesse.
Aldus geteykent per ducissam presents domino Bournegvalc (?) Specht.

(1) gelegen in de parochie van Schijndel.

Nr. 595 c | 15de eeuws afschrift